Will mir do so ne traumhafti Familie gfunde haend verbringe mir nomol e Tag
in Tata und im Douar tegermte tata, em gluecklichschte Ort wo ich uf daere
Waelt je gseh ha. Unsere Gaschtgaeber het huet am Morge frei gno und uns im
Dorf umegfiert. Mir sind in dr Schuel gseh (waerde huet zobe wohl mit de
Lehrer Aesse), uffere Baustell, in Alte Lehmhueser und Verwinklete Tunels.
Mir haend Tier ufem Dach besichtigt, haend d Fraue bim Tepichwaebe gseh,
Buttermilch und vill Tee trunke, vom Tunnel vo Paris nach London ghoert,
haend vo Fraue Gschaenggli becho und sind natuerlich gfrogt worde ob mir si
nid waend huerote. Alle Mensche, am beschte gseht mes an de Kinder, sind
eifach friedlich und gluecklich gseh. Ich bi aecht beidruckt und es macht
weh zwuesse, dass ich nie e Teil vo daem Laebe si wird, sondern nur Gascht
fuer kurzi Zyt und ich spuer zum erschtemol uf daere Reis was ich in Basel
zruggloh ha und jetzt nit bi mir ha, wo ich bis jetzt doch nur gluecklich
gseh bi.
Ich erwart jetzt e schwirigere Teil vo minere Reis, bi wider am me ne
aehnliche Punkt wie vor minere Abreis; ich weis nit was uf mi zuechunt.
Wirds e schwirigi Zyt oder chan ich s elai si wider gniesse?

Haerzlichi Griess Jonas.